Rom 7 | ATA | STEP | Vaivaikala noxilo ane 'o ulai noxinge ngingi ta vivilo ane ngelavusou lapuloto laixe aloxo 'o, no mine itema uxolu umaumauli o, la anu muxolu no anu saxisaxila'u no anu lapuloto, ia no mine usoli la lapuloto usaxila'u la uasi. Ngingi ngalavusou aloxo ne uasi?

a 7:4Rom 6:2, 11

b 7:6Rom 8:2, 6:4

c 7:7Mul 20:17; Lap 5:21

d 7:11Tav 3:13

e 7:121Ti 1:8

f 7:15Xal 5:17

g 7:23Xal 5:17; 1Pi 2:11

h 7:251Ko 15:57

Romans 7

Vaikala Tovola'i no Anu Taula'i

1 Vaivaikala noxilo ane 'o ulai noxinge ngingi ta vivilo ane ngelavusou lapuloto laixe aloxo 'o, no mine itema uxolu umaumauli o, la anu muxolu no anu saxisaxila'u no anu lapuloto, ia no mine usoli la lapuloto usaxila'u la uasi. Ngingi ngalavusou aloxo ne uasi? 2 Eni atovola'inu aloxo, lexe sema itaula'i ia mulue usoli uao, la ane mixolu no anu sakisaki sou taula'i noxou mulue sio. Ia lexe mulue ne usoli, la sou sakisaki sou taula'i ne usakiine la uasi, 3 la sou ane imomomo sou itaula'i la. Xo sakisaki sou taula'i usakiine la uasi. Ia lexe mulue usoli uao ia ane ilai iuluxu mulu vile la, la ilemele lexe ane sema sou vote'i.

4 ^aLa sou anu iouvilesisi aloxo ne noxinge ngingi ta vivilo ne kalumo. Ngingi vasimenge ne mupita noxou Kalisito vasimolu, la anu loxo ngingi kalumo ngesoli mo ngaxolu no anu saxisaxila'u no anu lapuloto la uasi. Vaimomo 'o ngingi ngexolu no anu saxisaxila'u noxou itema vilemo e musoli xe mutulu mo ngexali ta mitema noxou, aloxo ne sou nenge ta'oxonu 'ili'ilixo lailaixesi no iou Lataua. 5 Xo no mine nenge texolu temulimulinu masaxa no anu vasimengesi, la lapuloto muavutinoxu masaxa masua sou vasimenge, xe muxaxai no anu maulinenge la te'oxonu susu. No anu 'ilixo ane nesi la nene'axu ane soli nesi. 6 ^bIa vaimomo 'o nenge tesoli, mo te'umesou mimii e musakisakinenge tei ne, mo usakisakinenge la uasi. La sou vaimomo 'o nenge taxaxai sou tamulimulinu lapuloto e mikaukavunu muai no anu lavuku ne la uasi. Nenge ta'oxonu xaixai no anu vote'i alavua e Uleenu Tavuna uavutinenge sou ta'oxonu.

Susu Mu'oxonu Masuanenge Latala Mukalusi

7 ^cLexe lapuloto anu muavutinoxu masaxa masua sou vasimenge, la sou nenge tavikala a loxovaa? Lapuloto ne anu mii masua loxo susu ne? Vaikala vile uai aloxo ne, uasisi manina! Ia lexe lapuloto uxolu sou usu'ulileli uasi, la eni amomomo sou alavusou mii ma'ia e susu ne uasi, ia xo lapuloto muxolu la sou eni elavusou. Anu aloxo 'o, lapuloto muvikala lexe, “Naisuxu menexine miiu vile mamu.” Lexe lapuloto uvikala aloxo ne uasi, la eni amomomo sou alavusou lexe 'ilixo sou isuisu ne anu susu uasi. 8 Ia susu mukamuli vote'i sou vaikala e muxolu no anu lapuloto ne, la muavutinoxu 'ilixo sou isuisu iouiou no nano no opoleli. Lexe lapuloto ne uasi, la susu ne loxo anu mii musoli. 9 No mine eni alavusou lapuloto uasi la eni eno'u mauli, ia no mine elavusou lapuloto la susu muasaxa mutelo mupala'a xe mumauli. La eni esoli. 10 Eni emaisou aloxo 'o, lapuloto noxou Lataua ne mune'e sou itema uno'u mauli no anu. Ia eni la emaisou lexe, lapuloto ne mune'e la ulosilo mauli uasi, mune'e la mu'oxoleli esoli. 11 ^dXo susu mukamuli vote'i no anu lapuloto ne xe mu'oxo loloxo la muvelo esoli. 12 ^eAloxo ne la sou anu loxo lapuloto ne anu malemalenga mo lapuloto noxou Lataua ne malemalenga mo mulapu xe lailaixe manina.

13 Ia loxovaa, male mii e lailaixe ne muvelo la esoli? Mii vile aloxo ne uasisi manina! Sususi ane muvelo la esoli ne. Anu mu'oxonu mii e lailaixe ne la mu'oxoleli esoli. Anu mu'oxonu aloxo ne, sou uxalixu xaixai noxou lamana, la nenge talavusou lexe susu ne anu mii masua manina. No anu 'ilixo ane ne, la lapuloto noxou Lataua muxalixu xaixai no anu susu ne muxali lamana manina, lexe anu mii masua. Masua manina.

14 Xe nenge telavusou lexe lapuloto noxou Lataua ne anu mii molu noxousi. Ia eni amitema sou opo teinu la amomomo sou amulinu masaxa noxou Lataua uasi, xo susu musakisakileli la exali amitema sou xaixai vitanisi noxou. 15 ^fXo eni alavusou lexe tava'u loxovaa la sou eni a'oxo'oxonu 'ili'ilixo 'o uasi. 'Ili'ilixo ane eni amasaxa manina sou lexe a'oxo'oxonu ne, ane eni a'oxonu uasi. Ia 'ili'ilixo e eni amasaxa sou a'oxo'oxonu uasisi manina ne, ane eni alavusou a'oxo'oxonu utotomu 'o. 16 Mo lexe eni a'oxonu 'ili'ilixo e eni amasaxau sou a'oxo'oxonu uasi, la anu mumaxa'u lexe lapuloto noxou Lataua ne anu mii laixe no anu xavutala noxilo. 17 Aloxo ne, la anu mumaxa'u lexe eni melo a'oxonu mimii ne uasi, ia susu e muxolu no nano no anu maulixosi ne ane anu molu mu'oxonu ne. 18 Xo eni elavusou lexe mii vile laixe uxolu no nano no anu maulixo uasi. Eni avivikala no anu opo teinu noxilosi. Anu umomomo sou eni a'oxonu 'ilixo laixe e eni emasaxa sou a'oxonu ne, ia eni a'oxonu uasi. 19 La sou 'ilixo laixe e eni emasaxa lexe a'oxonu, ane eni a'oxonu uasi, ia 'ilixo masua e eni amasaxau sou a'oxonu uasi ne, ane eni a'oxo'oxonu utotomu 'o. 20 Ia vaimomo 'o lexe eni a'oxonu mimii e eni amasaxau sou a'oxo'oxonu uasi, la anu mumaxa'u lexe eni melo a'oxonu mimii ne uasi, ia susu e muxolu no nano no anu maulixo ne ane anu molu u'oxo'oxonu ne.

21 La sou eni emaisou lexe 'ilixo ane ne muxolu musaxila'u maulixo. La sou no mine eni amasaxa sou a'oxonu 'ilixo laixe la 'ilixo masua utalutaluxo. 22 Xo no nano no taleli manina, la eni emasaxau lapuloto noxou Lataua ne. 23 ^gIa eni emaisou lexe lapuloto vilemo a muxolu uxaxai no anu milemileli no vasimelo mukalusi 'o. Mo lapuloto ane vilemo ne u'oto no anu lapuloto noxou Lataua e uxolu no anu xavutalaxeni ne. Lapuloto ane vile ne, anu lapuloto sou susu, mo anu musakiskileli la musaxilau milemileli no vasimelo mukalusi. 24 Eni tu'umaxu ane 'o mu'oxo masualeli manina! 'Ena'ei tanuxo la sou uxexeenu vasimolu soli e uxoxolu noxilo 'o? 25 ^hEni alemolu laixe noxou Lataua no anu xaixai noxou Tila noxinge Iesu Kalisito sou musu'ulileli. La sou eni melo no anu xavutala noxilo la eni exolu no anu saxisaxila'u no anu lapuloto noxou Lataua, ia no anu opo teinu noxilo la eni exolu no anu lapuloto sou susu.